فيك الخصام وأنت الخصم والحكم

مبدئيا وقبل ما نخش في الموضوع أحب أقول إن رأيي استند على حقائق ومواقف حصلت وبتحصل .. وعلى تاريخ طويل مفاده أن الصمت والحل الوسط دايما بيجيب الكافية

ورأيي أن المجلس العسكري كما قلت سابقا في نوت بعنوان "لقد أسمعت لو ناديت حيا" ـ

وفيما يلي لينك نوت محترم عن فساد المجلس العسكري من قديم الزمان .. مش فاكر مين اللي كاتبه الصراحة إلا أنه قيم .. أنقر هنا

وعليه فالحادث أن الأعضاء الموقر جمعهم في المجلس خايفيين من الحساب اللي ممكن يطولهم في حالة تسليم السلطة (زي ما حصل مع مبارك) .. وعشان كده بيستخدموا كل وسائل التضليل لتشتيت الناس فيصبح بعضهم غافل وبعضهم غير مهتم وبعضهم متخيل أن الشرفاء في الميادين هم سبب أزماته .. كما انه يستخدم الإعلان الدستوري بإنتقائية شديدة .. ده غير مخالفاته الصارخة ليه؟؟
يعني مثلا المادة 59 تنص إن قانون الطوارئ ينتهي في سبتمبر .. لكن ما زالت المحاكمات العسكرية قائمة لكل شريف (عندك أشهر مثال علاء عبد الفتاح وهو بالمناسبة من أفضل من التقيتهم خلال الثورة) .. كمان تفويض صلاحيات رئيس الجمهورية للجنزوري مخالف لنص المادة 56 اللي بتقول ان لرئيس المجلس العسكري أن يفوض صلاحيات رئيس الجمهورية أو بعضها لأي من أعضاء المجلس .. وعليه فلو أي حد طعن او رفع قضية ضد التفويض ده هيكسبها.

واللي حاصل ده بسبب ان المجلس العسكري بيكتب المواد دي بمزاجه وبيعمل اللي على مزاجه برضه بدون الرجوع لحد بتاع قانون أو متخصص في الدستور مثلا، وما حدش يقوللي هما فاهمين .. خلينا ساكتينأصلا دول كلهم كان التخين فيهم جايب 70 % في الثانوية العامة (عذرا لاستخدام التعبير الطبقي ده لكن والله دي حقيقة) .. المهم كمان في موضوع الجنزوري إنه هيباشر مهام رئيس الجمهورية على النحو المبين تفصيلا في بيان هيصدره المشير ... آه والله

وبما إن الانتخابات شغالة ..والناس انشغلت بيها إلى حد كبير (يعني ربنا يكون في عون المواطن المصري والله هيلاحق على ايه ولا ايه !! على أكل العيش ولا المدام والعيال ولا الانتخابات ولا الثورة ولا التوك شو ولا الفواتير ولا المواصلات ولا البنزين .. حاجات كتير جدا) فمحدش فاضي للجدال بتاع حكومة انقاذ وطني حقيقية كالتي حدث عليها توافق تام في الميدان واللي فيها البرادعي وأبو الفتوح (طبعا عمرو موسى رفض المشاركة عشان عينه على الرئاسة .. إنما التانيين عشان محترمين مفرقش معاهم .. ولينا بوست عن الموضوعده لوحده إن شاء الله) ... وعدى موضوع الجنزوري لحد دلوقتي .. رغم إني مؤيد تماما للاعتصام اللي قدام مجلس الوزرا .. احنا عايزيين حكومة جديدة على الأقل طالما كل اللي ع الساحة كبار في السن (يعني مافيش داعي لرئيس وزرا مستعمل بحالة جيدة) وكمان مش فاهم ليه الاصرار على الاختيارات المستفزة (برغم إني مش بكره الجنزوري والله أعلم بفساده من عدمه .. بس على الأقل دلوفتي هو مغيب تماما .. ده غير انه كان ممنوع من السفر بقرار من النائب العام في يونيو 2011) ـ

الواقع الآن يفرض نفسه .. ولسة عن نفسي مش عارف أحدد اللي المفروض يتعمل ... يعني النزول المظاهرات طول ما هي تفتقد القاعدة الشعبية المجلس هيستعمل معاها أسوأ أساليب القمع أو التطنيش على أحسن الفروض .. وطالما معظم الشعب رضي بالواقع (اللي هو لا يختلف عن الماضي إلا حاجة بسيطة جدا قد كده ) فخلاص يبقى يجرب ويتعلم من أخطاءه ... يعني عايزيين الجنزوري .. والمجلس .. واحنا اللي بقينا مخربين .. سبحان الله .. خلاص أوك يا جماعة

البسوا بقى